Alls 68.300 landsmenn á aldrinum 25 til 64 ára eru með háskólamenntun eða um 40% allra á þessu aldursbili í fyrra að því er Hagstofan greinir frá. Er um að ræða 7,8 prósentustiga fjölgun frá árinu 2010. Þeir sem hafa einungis grunnmenntun á þessu aldursbili hefur jafnframt fækkað áfram, eða um 3,4 prósentustig frá því árinu 2015.
Af þessum hópi eru töluvert fleiri karlar en konur sem hafa eingöngu starfs- eða framhaldsmenntun, eða 45% karla á móti 30% kvenna. Á sama tíma hefur eins og gefur að skilja umtalsvert fleiri konur en karlar háskólamenntun eða 48% á móti 33% karla. Af þeim sem hafa eingöngu grunnmenntun er þó svipað hlutfall milli kynjanna eða 22%.
Óháð menntunarstöðu fækkaði atvinnulausum á þessu aldursbili í fyrra, en minnst atvinnuleysi var meðal háskólamenntaðra eða 1,6%, en mest hjá þeim sem höfðu lokið starfs- og framhaldsmenntun, eða 2,8%. Meðal þeirra sem höfðu einungis lokið grunnmenntun var atvinnuleysið 2,3%.
Munur milli landsbyggðar og höfuðborgar
Á aldursbilinu hafa um 28,5% íbúa utan höfuðborgarsvæðisins lokið háskólamenntun meðan sama hlutfall á höfuðborgarsvæðinu var 47,3%. Á landsbyggðinni er enn meiri munur milli kynjanna eftir því hvort þeir hafa klárað háskólamenntun en þar hafa 38,5% kvenna gert það en einungis 18,8% karla.
Flestir þeirra sem búsettir eru utan borgarinnar hafa þó lokið starfs- og framhaldsmenntun, eða 38,8%, það er 24.100 manns, en 32,7% hafa einungis lokið grunnmenntun eða 20.200 manns.
