Erfiðir nágrannar geta talist fasteignagalli og seljanda fasteignar ber að upplýsa kaupanda um slíkt, en þetta kemur fram í aðsendri grein Hildar Ýrar Viðarsdóttur , hæstaréttarlögmanns og meðeiganda á Landslögum, í Viðskiptablaðinu sem kom út á dögunum.

„Samkvæmt nýlegum dómi Landsréttar í máli nr. 726/2019 taldist fasteign haldin galla þar sem seljendur greindu ekki frá miklum og alvarlegum samskiptavanda í fjöleignarhúsinu sem hin selda fasteign var í," skrifar Hildur Ýr.

Fram kemur að kaupandi fasteignarinnar hafi haldið eftir 1 milljón króna af kaupverði fasteignarinnar, enda hafi hún talið að vart væri hægt að búa í húsinu vegna erfiðra nágranna. Hefði þetta ástand rýrt verðgildi fasteignarinnar. Seljendurnir kröfðust aftur á móti greiðslu eftirstöðva kaupverðsins í málinu.

„Seljendur upplýstu ekki um hinn mikla og alvarlega samskiptavanda, ekki um líkamsárás, eignaspjöll eða húsfund þar sem samþykkt var að bera íbúa miðhæðar út úr fasteigninni. Landsréttur féllst á að þessi vanræksla seljenda á upplýsingaskyldu sinni teldist galli í skilningi laganna um fasteignakaup. Lagt var til grundvallar mat dómkvadds matsmanns sem taldi verðmætisrýrnun fasteignarinnar nema 5-8% af kaupverði fasteignarinnar vegna þessa ástands í húsinu," skrifar Hildur Ýr.

Hildur Ýr segir alveg ljóst af dómi Landsréttar, sem og skrifum fræðimanna á þessu sviði, að upplýsingar um erfiða nágranna og alvarlegan samskiptavanda séu upplýsingar sem seljanda ber að veita kaupanda við sölu fasteignar.