Kvikmyndaveitan Netflix tilkynnti í morgun að veitan muni opna fyrir þjónustu sína í Þýskalandi, Frakklandi, Austurríki, Sviss, Belgíu og Lúxemborg.
Sérstaða flestra þessara landa er sú að þau eru öll vön því að horfa á kvikmyndir og þætti á eigin tungumáli. Það er nánast algilt í Þýskalandi og Austurríki.
Netflix hefur að eigin sögn 48 milljónir áskrifenda í yfir 40 löndum.
Netflix hyggst ekki opna fyrir þjónustu sína á Íslandi á næstunni.
Þrátt fyrir það voru um 20 þúsund heimili með Netflix hérlendis í febrúar. Þetta sýndu niðurstöður könnunar MMR fyrir Viðskiptablaðið.
Einn af hverjum sex Íslendingum eða 16,7% var þá með aðgang að Netflix á sínu heimili samkvæmt könnuninni.
5,5% svarenda sögðust ekki vera með þjónustuna en að þeir ætluðu að fá sér áskrift á næstu sex mánuðum.