Ítarleg umfjöllun er um hótelið Hlemmur á ferðasíðu The New York Times í dag. Þar segir að hægt sé að fá herbergi á hótelinu á verðbilinu 2500 krónur til 20 þúsund krónur.
Greint er frá því að hótelið hafi verið opnað í júní í fimm hæða byggingu í miðborg Reykjavíkur. Það sé staðsett á Laugavegi, aðalgötunni í miðborg Reykjavíkur. Þar séu 180 svefnpokapláss í sameiginlegum herbergjum á tveimur hæðum og 17 hótelherbergi á einni hæðinni. Til standi að standsetja fleiri herbergi á öðrum tveimur hæðum.
Í niðurlagi greinarinnar segir hótelgagnrýnandinn, Ingrid K. Williams, að Hlemmur sé þægilegra en hostel en þægindin séu minni en búast megi við á hefðbundnu hóteli.
