Nikki Haley, fastafulltrúi Bandaríkjanna hjá Sameinuðu Þjóðunum, hefur sagt af sér. Donald Trump Bandaríkjaforseti segir hana hafa staðið sig ótrúlega vel, en hún mun hætta störfum í lok árs.
Haley sagðist ekki hafa ákveðið hvað hún geri næst, og þvertók fyrir orðróm um að hún hygðist bjóða sig fram til forseta í næstu forsetakosningum, sem fram fara árið 2020.
Trump sagðist vona að Haley snéri aftur til starfa fyrir ríkisstjórnina einn daginn. „Kannski á öðrum vettvangi, þú mátt velja þér starf,“ er haft eftir honum. Hún er sögð hafa þakkað honum fyrir og sagt starfið hafa verið mikinn heiður.
