Tölvuleikjaframleiðandinn Nintendo hefur greint frá því að þrír nýir Pokémon leikir, sem ætlaðir eru fyrir Switch leikjatölvurnar, séu á leið á markað.
Nú þegar er búið að gefa út einn af þessum leikjum og er hægt að nálgast hann ókeypis. Hinir tveir leikirnir munu vera gefnir út í nóvember á þessu ári. Talið er að þetta útspil Nintendo muni tryggja yfirburði fyrirtækisins í tölvuleikjasölu næstu jóla.
Japanski tölvuleikagreinandinn Serkan Toto, telur að milljónir Pokémon aðdáenda muni kaupa sér Switch leikjatölvuna, eingöngu til þess að hafa möguleika á því að spila leikina.
Fjárfestar virðast vera sammála þessu, en hlutabréf Nintendo hækkuðu um rúm 4% í kjölfar þessara frétta.
Hlutabréfaverð Nintendo hefur rúmlega tvöfaldast eftir að fyrirtækið gaf Switch leikjatölvuna út fyrir rétt rúmu ári síðan.
