Forstjóri bílaframleiðandans Nissan segir að fyrirtækið myndi endurskoða viðskiptaáætlanir sínar og fjárfestingar í Bretlandi ef Bretar myndu ganga úr Evrópusambandinu.
Þetta sagði Carlos Ghosn, forstjóri Nissan, í samtali við BBC eftir að nýr Qashqai var kynntur. Til stendur að framleiða bílinn í Sunderland, en 6500 manns starfa í verksmiðjunni þar. Qashqai er mest seldi Nissan bíllinn í Evrópu og helmingur framleiðslunnar í Sunderland er Qashqai bílar.
David Cameron, forsætisráðherra Breta, hefur lofað því að þjóðaratkvæðagreiðsla um áframhaldandi aðild að Evrópusambandinu fari fram árið 2017 ef Íhaldsflokkurinn vinnur þingkosningar árið 2015.
