Norðlenska hefur keypt húseignir útgerðarfélagsins Vísis við Hafnarstétt 25-31 og Hafnarstétt 33 á Húsavík. Húsin eru um 5 þúsund fermetrar að stærð. Í húsunum var vinnslusalur Vísis, frystigeymslur, skrifstofur, gistiheimili og geymslur. Norðlenska er með öfluga starfsemi á Húsavík.
„Okkur hefur vantað meira frystipláss og eignumst nú stóra og góða frysta við Hafnarstétt. Við sjáum ýmis önnur tækifæri með kaupum á húsnæðinu en ekkert verður þó ákveðið strax í þeim efnum,“ segir Sigmundur Einar Ófeigsson, framkvæmdastjóri Norðlenska, í samtali við Vikudag .
Fyrir einu og hálfu ári keypti Norðlenska hús við Suðurgarð 2 á Húsavík af Vísi en þar er starfsemi dótturfyrirtækis Norðlenska, Icelandic Byproducts.
Norðlenska matborðið ehf. er eitt stærsta og öflugasta framleiðslufyrirtæki landsins á sviði kjötvöru. Fyrirtækið er með starfsstöðvar á Akureyri, Húsavík, í Reykjavík og á Höfn í Hornafirði.
