Breska flugfélagið easyJet kynnir í dag nýja vöru, Worldwide by easyJet, sem knúin er af tækni frá íslenska flugleitarvefnum Dohop.

Í fyrsta skipti í sögu easyJet býður félagið upp á þjónustu sem hjálpar viðskiptavinum að finna tengiflug segir í fréttatilkynningu. Annars vegar má finna tengingar milli tveggja easyJet fluga og hins vegar milli easyJet og samstarfsflugfélaga. Fram að þessu hefur easyJet aðeins selt eigin flug á sínum vef en brýtur með þessu blað í sögu sinni.

Worldwide by easyJet fer af stað í dag í samstarfi við tvö flugfélög, Norwegian og WestJet. Í fyrstu verður aðeins boðið upp á tengingar í gegnum Gatwick flugvöll í London en hann er aðalflugvöllur easyJet. Það er GatwickConnects þjónustan, sem Gatwick setti á laggirnar árið 2015 í samstarfi við Dohop, sem veitir tengifarþegum þjónustu á vellinum.

„Þetta samstarf við easyJet boðar tímamót í sögu Dohop,” segir Davíð Gunnarsson, framkvæmdastjóri félagsins. „easyJet er leiðandi lággjaldaflugfélag í Evrópu og það áttunda stærsta í heimi miðað við farþegafjölda. Okkar hugbúnaður hjálpar þeim að stíga stórt skref í átt að áframhaldandi vexti og styrkja stöðu sína sem brautryðjendur meðal flugfélaga í heiminum."

Dohop hefur frá stofnun félagsins árið 2004 einbeitt sér að því að finna tengingar milli lággjaldaflugfélaga og hefðbundinna flugfélaga. Dohop kynnti nýja vöru, Dohop Connect, í nóvember á síðasta ári og býður þar notendum upp á að bóka og greiða fyrir tvo aðskilda flugmiða í einu lagi. Það er sú tækni sem Worldwide by easyJet byggir á, ásamt samstarfi Dohop og Gatwick.