Ný nefnd hefur verið stofnuð sem mun starfa undir FKA, Félagi kvenna í atvinnulífinu. Hún mun heita ungar athafnakonur og var stofnuð fyrir ungar konur sem hafa áhuga og metnað fyrir atvinnulífinu og starfsframa sínum. Stofnun nefndarinnar var kynnt og samþykkt á aðalfundi FKA í maí, en starfsemi hennar mun hefjast í haust.
Lilja Gylfadóttir, forsprakki nefndarinnar, segir í viðtali við Morgunblaðið , þörf hafa verið á nefnd sem þessari fyrir ungar konur með metnað og háleit markmið. Hugmyndina að stofnun nefndarinnar fékk hún eftir að hafa sótt viðburði á vegum FKA með mömmu sinni, „mamma er búin að vera í FKA mjög lengi og þetta byrjaði þannig að hún bauð mér með á viðburði sem leyfðu gesti. Þar var ég alltaf langyngst, en þótti samt fyrirlestrarnir og umræðurnar mjög áhugaverðar. Mér fannst vanta eitthvað slíkt fyrir yngri konur, þar sem ég held að margar hefðu áhuga á að koma á slíka viðburði og hitta þessar konur og læra af þeim.“
Að sögn Lilju verður stílað inn á áhugaverða fyrirlestra og konur sem skarað hafa fram úr fengnar til að tala. Einnig er stefnt að því að halda áhugaverða fyrirlestra, til dæmis um það hvernig best sé að vera í atvinnuviðtali og hvaða möguleika maður hefur eftir háskóla. Að sögn Lilju er ekki einblínt sérstaklega á viðskiptafræði, „leiðtogar koma úr öllum námsgreinum og öllum áttum“ segir hún að lokum.
