Smáralind og Sena ehf undirrituðu síðastliðinn fimmtudag með sér samkomulag um breytingar og endurnýjun á innviðum Smárabíós í Smáralind. Þetta kemur fram í fréttatilkynningu.
„Í siðustu viku var lokið við að endurnýja öll sæti bíósins og á næstu vikum og mánuðum verður ráðist í breytingar og endurbætur á hinum ýmsu þáttum bíósins til að gera upplifun bíógesta sem skemmtilegasta,“ segir í tilkynningunni.
Samkomulagið felur í sér að Sena og Smáralind munu í sameiningu fjármagna viðhald og breytingar á bíóinu næstu mánuðina auk þess sem leigusamningur var endurnýjaður.
„Smárabíó hefur verið flaggskip í okkar rekstri í mörg ár og við höfum átt gott samstarf við Smáralind á þessum tíma. Við erum því gríðarlega ánægðir með þetta samkomulag þar sem það tryggir nauðsynlega endurnýjun á innviðum sem eru mikilvæg í rekstri kvikmyndahúsa,“ segir Björn Sigurðsson, framkvæmdastjóri Senu.
