*

sunnudagur, 26. janúar 2020
Fólk 6. janúar 2020 14:27

Nýir eigendur og nýr forstjóri Wise

Jóhannes H. Guðjónsson kemur frá Össur til að taka við stjórn Wise sem hyggst sameinast Hugbúnað hf, og Centara ehf.

Ritstjórn
Jóhannes Helgi Guðjónsson hefur tekið við sem forstjóri Wise lausna af Hrannari Erlingssyni sem stýrt hefur fyrirtækinu sínu 13 árin.
Aðsend mynd

Hugbúnaðarfyrirtækið Wise lausnir ehf. komst í meirihlutaeigu Vörðu Capital ehf. í lok október á síðasta ári og hafa nýir eigendur bæði kjörið nýjan stjórnarformann félagsins, Jónas Hagan Guðmundsson og ráðið nýjan forstjóra, Jóhannes H. Guðjónsson, sem er fyrrum CIO hjá Össur, en hann tók við þann 1. janúar síðstliðinn.

Á sama tíma tekur Gunnar Björn Gunnarsson við sem framkvæmdastjóri fjármálasviðs og lætur um leið af stjórnarformennsku Wise lausna ehf. Stefán Þór Stefánsson hefur tekið við sem framkvæmdastjóri ráðgjafa- og þjónustusviðs félagsins, en Hrannar Erlingsson, framkvæmdastjóri Wise til 13 ára, segir skilið við félagið.

Til stendur að sameina Hugbúnað hf., Centara ehf. og Wise lausnir ehf. undir merki Wise lausna. Einnig eru viðræður í gangi um aðkomu fleiri öflugra fjárfesta sem mun styrkja félagið til frekari vaxtar.

Hjá Wise starfa um 75 starfmenn en félagið sérhæfir sig í fjölbreyttum lausnum fyrir mörg af stærstu fyrirtækjum landsins. Á meðal 500 viðskiptavina Wise eru sveitarfélög og fyrirtæki í sjávarútvegi, fjármálum, framleiðslu, verslun og ýmiskonar sérfræðiþjónustu.

Jónas Hagan Guðmundsson stjórnarformaður Wise segir „að félagið hafi náð frábærum árangri hér heima og erlendis sem hann þakkar mikilli reynslu og þekkingu starfsfólksins á þróun viðskiptalausna Wise. Saman hlökkum við til að takast á við spennandi tækifæri sem félögin hafa myndað saman síðustu ár. Til stendur að bæta við fleiri öflugum fjárfestum í eigendahóp Wise og skoða kaup og sameiningar til að styrkja Wise enn frekar.“

Jóhannes H. Guðjónsson forstjóri Wise bætir við „að við munum halda áfram að renna enn frekar stoðum undir þróun og þjónustu lausna fyrir kröfuharða viðskiptavini hér heima og erlendis. Markmiðið er að byggja upp öflugt og leiðandi félag á íslenskum og erlendum markaði.“