*

laugardagur, 16. október 2021
Fólk 24. september 2021 10:15

Bergsteinn og Sara í framkvæmdastjórn

Bergsteinn Ó. Einarsson fer fyrir áhættustýringarsviði Landsbankans og Sara Pálsdóttir stýrir samfélagssviði.

Ritstjórn
Sara Pálsdóttir og Bergsteinn Ó. Einarsson
Aðsend mynd

Landsbankinn hefur ráðið Bergsteinn Ó. Einarsson og Söru Pálsdóttur í framkvæmdastjórn bankans. Þetta kemur fram í tilkynningu á vef bankans.

Bergsteinn Ó. Einarsson hefur verið ráðinn framkvæmdastjóri áhættustýringar hjá Landsbankanum en hann tekur við starfinu af Perlu Ösp Ásgeirsdóttur. Bergsteinn hefur verið forstöðumaður hjá bankanum frá árinu 2012, verið staðgengill framkvæmdastjóra áhættustýringar undanfarin ár og hefur gegnt starfi framkvæmdastjóra frá því í vor. Bergsteinn hóf störf sem sérfræðingur í áhættustýringu hjá Landsbankanum árið 2008 og hafði áður starfað við áhættustýringu hjá Kaupþingi á árunum 2005 til 2006. Bergsteinn er með B.Sc.-próf í stærðfræði frá Háskóla Íslands.

Þá hefur og Sara Pálsdóttir hefur verið ráðin framkvæmdastjóri samfélagssviðs, sem er nýtt svið hjá bankanum, en undir það heyra mannauðsmál, markaðsmál, fræðsla, samskipti, samfélagsábyrgð og hagfræðideild.

Sara hefur starfað hjá Eimskip frá árinu 2011, síðast sem forstöðumaður innflutningsdeildar. Áður vann hún m.a. hjá Reckitt Benckiser Healthcare í Bretlandi þar sem hún var sérfræðingur í markaðsgreiningu og hún vann hjá Landsbankanum, að hluta til með námi, á árunum 2004-2008. Sara er með meistaragráðu í alþjóðaviðskiptum frá Háskólanum á Bifröst og með B.Sc.-gráðu í viðskiptafræði, með áherslu á markaðsmál og ferðaþjónustu, frá Háskólanum á Akureyri.

Lilja Björk Einarsdóttir, bankastjóri Landsbankans:

„Öflug áhættustýring er mikilvægur þáttur í traustum rekstri bankans. Hlutverk Áhættustýringar er að hafa yfirsýn yfir alla áhættuþætti og styðja önnur svið bankans við stjórnun áhættu ásamt því að vera í reglulegu sambandi við eftirlitsaðila. Bergsteinn hefur sýnt leiðtogahæfileika í starfi og er með afbragðs yfirsýn og skilning á samþættingu ólíkra áhættuþátta. Hann er úrræðagóður og skilur vel hlutverk og þátt áhættustýringar við að færa bankastarfsemi enn hraðar inn í framtíðina.

Sara er þaulreynd í samskiptum og stjórnun og hefur yfirgripsmikla reynslu úr íslensku viðskiptalífi. Hún er mikil rekstrarkona og hefur borið ábyrgð á farsælum viðskiptasamböndum Eimskips við öll stærstu innflutningsfyrirtæki landsins. Samfélag er nýtt svið sem endurspeglar áherslur Landsbanka nýrra tíma. Okkar grunngildi er traust og við viljum efla jákvæð tengsl viðskiptavina við bankann. Sara áttar sig vel á þeirri áskorun að skara fram úr í samkeppni um tryggð viðskiptavina og hvernig ánægja starfsfólks stuðlar að betri þjónustu og aukinni ánægju viðskiptavina.“