Nýir menn hafa verið valdir í efstu sætin á framboðslistum stjórnmálaflokkanna miðað við þau atkvæði sem þegar hafa verið talin.
Bjarni Benediktsson er efstur hjá sjálfstæðimönnum í Suðvesturkjördæmi, Illugi Gunnarsson er efstur hjá sjálfstæðismönnum í Reykjavík og Árni Páll Árnason er efstur hjá Samfylkingunni í Suðvesturkjördæmi.
Þá er Jóhanna Sigurðardóttur efst í prófkjöri Samfylkingarinnar í Reykjavík.
Þessi fjögur verða því nýir oddvitar framboðslista í kosningunum í apríl.
Guðlaugur Þór Þórðarson er í öðru sæti hjá sjálfstæðismönnum í Reykjavík og Össur Skarphéðinsson er í öðru sæti hjá Samfylkingunni. Haldi þeir þessum sætum munu þeir leiða lista síns flokks í öðru hvoru Reykjavíkurkjördæminu.
Guðlaugur Þór leiddi lista Sjálfstæðisflokksins í Reykjavík norður fyrir síðustu kosningar og Össur leiddi lista Samfylkingarinnar í því sama kjördæmi.
Lokatölur eiga enn eftir að berast.
