Breytingar hafa orðið á starfsliði Einkabankaþjónustu Landsbankans að undanförnu til samræmis við yfirlýsta stefnu bankans um að efla mjög og styrkja þá þjónustu.
Þetta kemur fram í tilkynningu frá bankanum. Þeir sem hafa verið ráðnir eru:
Brynjar Sigurðarson hefur verið ráðinn sérfræðingur í Einkabankaþjónustu Landsbankans. Brynjar er viðskiptafræðingur frá Bifröst og með MSc. í fjármálum og stefnumótun frá Copenhagen Business School. Brynjar hóf störf hjá Landsbankanum sem forstöðumaður Landsbréfa á Norðurlandi í maí 2000, var framkvæmdastjóri Landsbankans Framtakssjóðs frá 2003 til 2004, en eftir tveggja ára nám í Kaupmannahöfn var hann ráðinn sem sérfræðingur hjá Einkabankaþjónustu Landsbankans. Síðastliðin tvö ár hefur Brynjar starfað hjá Íslenskum verðbréfum.
Vigdís Sif Hrafnkelsdóttir hefur verið ráðin til Einkabankaþjónustu Landsbankans. Hún er viðskiptafræðingur frá Háskólanum á Akureyri og hefur nýlokið meistaranámi í alþjóðaviðskiptum frá Háskólanum í Reykjavík. Vigdís lauk prófi í verðbréfaviðskiptum vorið 2002, hún starfaði á árunum 2000 - 2009 við eignastýringa- og einkabankaþjónustu Íslandsbanka og forvera hans. Síðustu fjögur árin gegndi hún stöðu deildarstjóra eignastýringaþjónustu einstaklinga.
Eyrún Anna Einarsdóttir hefur verið ráðin forstöðumaður Stýringar eigna. Eyrún hefur frá árinu 2006 starfað í Eignastýringu Landsbankans sem sjóðsstjóri yfir söfnum þriðja aðila. Hún lauk prófi í verðbréfaviðskiptum vorið 2008, MSc. í fjárfestingarstjórnun frá Háskólanum í Reykjavík árið 2006 og BS í iðnaðarverkfræði úr Háskóla Íslands á árinu 2004. Áður starfaði hún hjá Orkuveitu Reykjavíkur í ýmsum verkefnum tengdum arðsemisútreikningum
Þorvaldur Þorsteinsson hefur verið ráðinn forstöðumaður Einkabankaþjónustu Landsbankans. Þorvaldur er viðskiptafræðingur af endurskoðunarsviði frá HÍ 1991 og hefur lokið prófi í verðbréfaviðskiptum. Auk þess hefur hann stundað MS nám í alþjóðaviðskiptum við Copenhagen Business School í Kaupmannahöfn. Þorvaldur hefur starfað í Landsbankanum sem sérfræðingur í einkabankaþjónustu frá árinu 2004. Áður gegndi hann stöðu forstöðumanns fjármála og síðar áhættustjórnar hjá Kreditkortum hf.
Framkvæmdastjóri Einkabankaþjónustu Landsbankans er Hrefna Ösp Sigfinnsdóttir.