*

laugardagur, 24. júlí 2021
Innlent 4. apríl 2018 11:37

Nýjan sæstreng þarf á 7 ára fresti

Framkvæmdastjóri Thule Investments segir eðlilegt að ríkið fjármagni nýjan fjarskiptasæstreng upp á 6 til 7 milljarða.

Ritstjórn
Gísli Hjálmtýsson er auk starfa sem forseti tölvunarfræðideildar HR framkvæmdastjóri Thule Investments.
Aðsend mynd

Gísli Hjálmtýsson framkvæmdastjóri Thule Investments og forseti tölvunarfræðideildar HR segir að leggja þurfi nýjan fjarskiptasæstreng til landsins á um 7 ára fresti miðað við kröfur tækniþróunarinnar.

Þetta kemur fram í Morgunblaðinu en Gísli hefur leitt verkefni um lagningu nýs sæstrengs milli Íslands, Írlands og Noregs. Segir hann nettengingar samkeppnislanda okkar sem leiða þróun gagnaversiðnaðarins áreiðanlegri, hraðari og ódýrari en hér á landi.

„Það er því erfitt að laða að stór gagnaver sem treysta á áreiðanlegt samband og öflugar nettengingar,“ segir Gísli. „Af þeim sökum eru hér á landi einkum gagnaver með mikilli reiknigetu, eins og bitcoinnámur, sem þarfnast ekki mikils áreiðanleika og bandvíddar.“

Segir hann nýjan sæstreng kosta um 6 til 7 milljarða króna og finnst honum eðlilegt að ríkið fjármagni strenginn. Þó hefur KPMG sagt í nýlegri úttekt á gagnaversiðnaðinum að mögulegir viðskiptavinir gagnavera hér á landi litu það neikvæðum augum að einungis eitt fyrirtæki, Farice sem er að meirihluta í eigu ríkisins, bjóði nettengingar við umheiminn.