Nýsköpunarsjóður atvinnulífsins hefur undirritað samning um kaup á 25% hlut í sprotafyrirtækinu Videntifier Technologies ehf. Markmið eigenda félagsins er að byggja Videntifier Technologies upp sem öflugt íslensk hátæknifyrirtæki, leiðandi á sínu sérsviði á alþjóðavísu.
Vara félagsins, Videntifier Forensic, getur á alsjálfvirkan hátt borið kennsl á myndefni á tölvum og þannig aðstoðað við að uppræta barnaklám og annað ólöglegt myndefni. Kerfið eykur afköst lögreglunnar til muna við greiningu myndefnis. Tæknin á bak við þjónustuna er á heimsmælikvarða og byggir á rannsóknarvinnu við Háskólann í Reykjavík og við rannsóknarstofnunina IRISA í Frakklandi.
Félagið markaðssetur lausnina til lögregluembætta um allan heim, og er nú að byggja sér alþjóðlegt sölunet.
„Við erum mjög ánægð með fjárfestinguna í Videntifier. Við höfum mikla trú á fyrirtækinu og þeim vaxtarmöguleikum sem fylgja þessari fjárfestingu. Fyrirtækið er stofnað af öflugum hópi með skýra framtíðarsýn, og Háskólanum í Reykjavík. Við fögnum því þegar háskólarannsóknir leggja grunninn að hagnýtri vöru, sem er notuð til að byggja upp gjaldeyrisskapandi fyrirtæki eins og Videntifier . Fyrir okkur sem fjárfesta er jafnframt mikill kostur að Videntifier hefur þegar hafið viðræður við alþjóðlega samstarfsaðila sem staðfestir vaxtamöguleika fyrirtækisins erlendis," segir Helga Valfells, framkvæmdarstjóri Nýsköpunarsjóðs atvinnulífsins, í tilkynningu.
Herwig Lejsek, framkvæmdastjóri Videntifier Technologies segir að kerfi félagsins sé nú til reynslu hjá lögreglunni í Danmörku og á Möltu. „Fjárfesting NSA mun hjálpa okkur mikið við markaðsetninguna á Videntifier Forensic erlendis, til að styðja dreifingaaðila okkar, og í kynningu á þjónustunni á tækniráðstefnum fyrir lögreglu. Kerfið er núna til reynslu hjá lögreglunni í Danmörku og á Möltu og verður afhent til hryðjuverkadeildar í bresku lögreglunni í janúar 2011. Viðræður við fleiri eru í gangi. Samhliða þessu liggur á að stækka kerfið og að þróa tæknihluta lausnarinnar áfram, og fjármagnið mun líka nýtast okkur vel þar.”
Um Videntifier Technologies ehf.
Videntifier Technologies ehf. er íslenskt hátæknifyrirtæki, sem hefur þróað hugbúnað í samstarfi við Háskólann í Reykjavík, sem getur sjálfkrafa borið kennsl á mynd- og videoefni. Félagið hefur 6 starfsmenn í dag og mun stækka á komandi mánuðum.
Um Nýsköpunarsjóð
Nýsköpunarsjóður atvinnulífsins ( www.nsa.is ) er áhættufjárfestir sem tekur virkan þátt í þróun og vexti atvinnulífsins með því að fjárfesta í vænlegum nýsköpunar- og sprotafyrirtækjum. Nýsköpunarsjóður er óháður fjárfestingarsjóður í eigu íslenska ríkisins.