Bankaráð Landsbankans hefur ákveðið að nýta heimild til kaupa á eigin hlutum í bankanum sem veitt var á aðalfundi bankans 14. apríl 2016. Kaupin munu nema að hámarki 480 milljónum hluta eða sem nemur 2% af útgefnu hlutafé.

Tilgangurinn með endurkaupaáætluninni er að lækka eigið fé bankans og um leið gefa hluthöfum kost á að selja hluti sína í bankanum með gagnsæjum hætti en hömlur á framsali hlutanna féllu niður 1. september 2016.

Eiginfjárhlutfall Landsbankans er 28,6% sem er verulega umfram kröfur eftirlitsaðila. Bankinn hefur lækkað eigið fé með því að greiða stóran hluta hagnaðar undanfarinna ára út sem arð. Arðgreiðslur bankans á árunum 2013-2016 nema alls 82 milljörðum króna.

Bankinn býðst til að kaupa hluti af hluthöfum á eftirfarandi þremur endurkaupatímabilum:

  • 19. september 2016 - 30. september 2016
  • 31. október 2016 - 9. desember 2016
  • 13. febrúar 2017 - 24. febrúar 2017

Kaupverð mun geta tekið breytingum

Í samræmi við ákvörðun aðalfundar mun Landsbankinn bjóðast til að kaupa hvern hlut á gengi sem samsvarar hlutfallinu á milli eigin fjár sem tilheyrir hluthöfum bankans og hlutafjár bankans, samkvæmt síðasta birta uppgjöri áður en viðkomandi endurkaupatímabil hefst. Kaupverð hlutanna mun þannig geta tekið breytingum milli endurkaupatímabila í samræmi við niðurstöður árshlutauppgjörs eða ársuppgjörs áður en viðkomandi endurkaupatímabil hefst.

Samkvæmt árshlutauppgjöri Landsbankans fyrir fyrstu sex mánuði ársins 2016 er eigið fé sem tilheyrir hluthöfum bankans 247.249.765.805 krónur og útistandandi hlutafé 23.781.690.382 krónur. Í samræmi við framangreint býðst Landsbankinn því til að kaupa hvern hlut á genginu 10,3966 á fyrsta endurkaupatímabilinu.

Góð afkoma bankans skapar svigrúm til endurkaupa

Landsbankinn hyggst birta árshlutareikning sinn fyrir fyrstu níu mánuði ársins 2016 þann 27. október 2016 og ársreikning fyrir árið 2016 þann 9. febrúar 2017. Bankinn mun birta upplýsingar um það verð sem hann býðst til að greiða fyrir eigin hluti á næsta endurkaupatímabili í  tengslum við uppgjörstilkynningar sínar.

Á aðalfundi bankans þann 14. apríl 2016 var samþykkt að greiða 28.538 milljónir króna í arð vegna reikningsársins 2015. Um leið var bankanum veitt heimild til kaupa á eigin hlutum. Heimildin gaf kost á að meta síðar á árinu hvort unnt væri að færa meira fé til eigenda, í ljósi aðstæðna. Góð afkoma bankans á þessu ári veldur því að slíkt svigrúm er fyrir hendi. Kaup bankans á eigin hlutum koma þannig til viðbótar við arðgreiðsluna og lækka eigið fé bankans.

Ríkið eignaðist 98% hlut í bankanum

Við stofnun Landsbankans 7. október 2008 lagði íslenska ríkið nýja bankanum til 775 milljónir króna í eigið fé og síðar 121,2 milljarða króna til viðbótar í formi skuldabréfs með gjalddaga árið 2018, eða samtals 122 milljarða króna. Þar með eignaðist íslenska ríkið 81,33% hlutafjár í bankanum en LBI hf., slitabú gamla Landsbanka Íslands, átti 18,67% hlut. Í apríl 2013 gaf Landsbankinn út skilyrt skuldabréf til LBI að fjárhæð 92 milljarðar króna og við það framseldi LBI hluti sína í bankanum til íslenska ríkisins. Þar með fór eignarhlutur ríkisins í um 98%.

Á sama tíma eignuðust þáverandi og fyrrverandi starfsmenn Landsbankans hluti í bankanum, sem áður voru í eigu LBI, í samræmi við samning íslenska ríkisins, bankans og LBI frá 15. desember 2009. Á þeim hlutum voru kvaðir um að ekki mætti framselja hlutina fyrr en 1. september 2016 en gert hafði verið ráð fyrir að búið yrði að skrá hlutabréf í bankanum á skipulegan verðbréfamarkað fyrir þann tíma.

Sparisjóðirnir runnu saman við Landsbankann

Árið 2015 runnu Sparisjóður Norðurlands og Sparisjóður Vestmannaeyja saman við Landsbankann og fengu þá rúmlega 400 stofnfjáreigendur endurgjald sem greitt var með hlutum í Landsbankanum. Á þeim hlutum voru samsvarandi hömlur á framsali.

Alls eru hluthafar Landsbankans 1.833 talsins. Íslenska ríkið er stærsti hluthafi bankans og á 98,2% hlut. Bankinn á sjálfur 0,91% hlut. Þá eiga um 870 núverandi starfsmenn bankans, um 530 fyrrverandi starfsmenn og um 430 fyrrum stofnfjárhafar í tveimur sparisjóðum samtals 0,89%. Bankaráðsmenn Landsbankans eiga ekki hluti í bankanum.

Að loknu hverju endurkaupatímabili mun Landsbankinn upplýsa um heildarfjölda seldra hluta og hvort bankastjóri eða framkvæmdastjórar hjá bankanum hafi selt hluti í bankanum.