Fyrirtækið Efnalausnir ehf. tók nýlega til starfa. Fyrirtækið sérhæfir sig í framleiðslu á hreinsiefnum og framleiðir efni sem eru þróuð á Íslandi. Framkvæmdastjóri félagsins er Indriði Björnsson efnafræðingur og stjórnarformaður er Haukur Þór hauksson rekstrarhagfræðingur.
Úr tilkynningu:
„Efnalausnir sérhæfa sig í framleiðslu á hreinsiefnum fyrir matvælaiðnaðinn þ.e. fisk- og kjötvinnslu. Einnig er stefnt að framleiðslu hreinsiefna fyrir mjólkuriðnað og drykkjarvöruframleiðendur.
Efnin sem fyrirtækið framleiðir eru þróuð á Íslandi á rannsóknarstofu Efnalausna ehf. með tilliti til eiginleika íslenska vatnsins með þvottahæfni og umhverfissjónarmið að leiðarljósi.
Efnalausnir bjóða upp á öflug hreinsiefni á mjög hagstæðu verði, ráðgjöf, þrifaáætlun, námskeið og þjónustu sem viðkemur þrifum í matvælaiðnaði.
Fyrirtækið er með verksmiðju hjá Nýsköpunarmiðstöðinni að Keldnaholti í Reykjavík. Í henni er vel útbúin rannsóknarstofa, nauðsynleg áhöld og framleiðslutæki. Framleiðslugeta um 3-4000 ltr./dag
Helstu efnin eru EL-kvoðuhreinsiefni og EL-sótthreinsiefni. Efnin hafa verið í notkun og prófunum hjá um 15 fyrirtækjum um víðsvegar um landið og hafa fengið góða dóma.
Niðurstöður frá Rannsóknaþjónustunni Sýni ehf gefa til kynna að þrif á prufutíma séu mjög góð og að EL hreinsiefnin hafi mikið hreinsi- og sótthreinsiafl.
Við þróun efnanna var lögð áhersla á öfluga þrifaeiginleika, gott geymsluþol, auðvelda notkun, rekjanleika vörunnar, eiginleika íslenska vatnsins og umhverfissjónarmið.
Auk núverandi framleiðslu hyggjast Efnalausnir þróa ýmis hreinsiefni í samstarfi við viðskiptavini sína og sinna eftirspurn eftir hreinisefnum á Íslenska markaðinum.“