Icelandair hótel hafa fest kaup á fasteigninni sem nú hýsir Hótel Reykjahlíð við Mývatn. Þetta kemur fram í fréttatilkynningu.
Hótelið telur níu herbergi og veitingasal og er staðsett á einstökum útsýnisstað við vatnið, í næstu grennd við þjónustukjarna Mývatnssveitar. Áform eru um að stækka hótelið.
„Fjölgun herbergja ein og sér er ekki meginmarkmið Icelandair hótela. Við viljum hinsvegar leggja metnað í markvissa uppbyggingu ferðaþjónustu á Íslandi með því að auka gæði hótelgistingar og veitingaþjónustu þar sem við stígum niður fæti,“ segir Magnea Þórey Hjálmarsdóttir, framkvæmdastjóri Icelandair hótela.
Icelandair hótel fá Hótel Reykjahlíð afhent nú í haust, en fram að þeim tíma verður rekstur hótelsins í höndum fyrrum eigenda þess sem jafnframt reka hótel Reynihlíð við Mývatn.
