Viðskiptablaðið sendi fyrirspurn til bæði Landsbanka Íslands og Arion banka um hvort vaxtabreytinga hjá bönkunum megi vænta á næstunni. Landsbankinn sagðist vera sífellt að meta vaxtastig á innlánsreikningum og útlánum. Meðal annars með hliðsjón af vöxtum Seðlabankans, vöxtum á markaði og öðrum fjármögnunarkjörum en ekki er greint frá vaxtaákvörðun fyrr en hún liggur fyrir. Arion banki er ekki að skoða vaxtabreytingu, að svo stöddu.

Viðskiptablaðið greindi frá því í lok síðustu viku að Íslandsbanki hygðist hækka vexti um allt að 0,35 prósentustig. Íslandsbanki segir ástæðuna megi rekja til hærri fjármögnunarkostnaðar og vísar þá til ávöxtunarkröfu á skuldabréfamarkaði sem hefur hækkað talsvert. Fastir óverðtryggðir vextir húsnæðislána til 60 mánaða hækka úr 4,05% í 4,40%.

Hjá Íslandsbanka hækka verðtryggð húsnæðislán með vaxtaendurskoðun úr 1,95% í 2,05%. Eins og er fást slík lán hjá Landsbanka Íslands með 2% vöxtum og 2,74% vöxtum hjá Arion banka.

Ávöxtunarkrafa óverðtryggðra ríkisskuldabréfaflokksins RIKB 31 0124 sem eru á gjalddaga árið 2031 er nú rúmlega 3,1%. Krafan er því eilítið hærri en hún var að jafnaði í febrúarmánuði á þessu ári þegar stýrivextir Seðlabankans voru 2,75%.

Ávöxtunarkrafa á verðtryggð skuldabréf viðskiptabankanna þriggja hefur sveiflast mikið það sem af er ári. Nú um mundir er krafan á lengstu bréfin tæplega eitt prósent hjá bönkunum þremur sem er sambærilegt og í upphafi marsmánaðar er meginvextir Seðlabankans voru 2,75%.

Krafan á þeim bréfum náði lægstu lægðum á þessu ári í ágúst þegar hún var 0,1-0,2% og hefur hækkað skarpt síðan þá.