Bandaríkjamenn fögnuðu Þakkargjörð í gær, þar sem hefðbundið er að sækja fjölskyldu og vini heim og borða vel útilátið af kalkúni og ýmsu meðlæti, en í þetta sinn var máltíðin sú ódýrasta síðan 2010 eftir 4% verðlækkun frá síðasta ári.
Þetta kemur fram í árlegri könnun bandarísku landbúnaðarsamtakanna, en þetta er í 35. sinn sem hún er gerð. Samkvæmt könnuninni var meðalkostnaðurinn á máltíð fyrir 10 einstaklinga 46,90 Bandaríkjadalir, sem samsvarar um 6.357 íslenskum krónum.
Þar af var kalkúninn sjálfur um 7% ódýrari en á síðasta ári, eða á einungis 19,39 dalir, eða sem samsvarar 2.628 krónum. Miðað er við 16 punda kalkún sem er ríflega 7 kíló.
„Verðlagning á kalkún með leiðandi afsláttarkjörum til að æsa upp í viðskiptavinum og koma öðrum vörum út er herkænska sem við sjáum yfir hátíðirnar,“ hefur yahoo finance eftir John Newton, aðalhagfræðingi samtakanna.
Þrátt fyrir truflanir á birgðalínum kalkúna á árinu vegna kórónuveirufaraldursins var framboðið nægt. Í verðmælingu samtakanna er auk kalkúnsins gert ráð fyrir fyllingu, sætum kartöflum, brauðbollur með smjöri, baunir, trönuber, grænmeti og graskersbaka með rjóma, kaffi og mjólk.
Skammtastærðin eins og Bandaríkjamönnum er lagið á að duga 10 manns, ásamt því að gert er ráð fyrir nægum afgangi. Þær vörur sem hækkuðu í verði voru á móti brauðbollurnar, fyllingin og graskersbökuduftið.
Fyrir utan minni kostnað við matinn er búist við að Bandaríkjamenn hafi eytt minna í ferðalög þessa Þakkargjörðina vegna smithættu og viðvarana um að draga úr þeim.
Ferðakostnaðurinn hefur að þeim sökum dregist saman um einhver 10% á árinu, og hefur verðlækkunin ekki verið meiri síðan árið 2008. Þannig eru flugfargjöld milli New York borgar og Dallas í Texas, fram og til baka, búin að lækka um 41% frá meðaltali áranna 2019 og 2018.
