Iðnaður hér á landi er einsleitur og reiðir hann sig verulega á ódýra, hreina orku vegna þess hversu orkufrekur hann er. Þá er landeyðing vandi, m.a. vegna ofbeitar, sem styrkjakerfi í landbúnaði ýtir undir. Sívaxandi ferðamannastraumur á sama tíma eykur álagið á viðkvæma náttúru til muna. Hætta er á að ágreiningur verði um landnýtingu vegna ólíkra hagsmuna þeirra sem vilja annars vegar nýta náttúruna til orkuframleiðslu og hins vegar þeirra sem vilja auka náttúrutengda ferðaþjónustu.

Þetta er á meðal þeirra helstu áskorana sem Efnahags- og framfarastofnunin (OECD) fjallar um í heildarúttekt á umhverfismálum Íslendinga. Þetta er þriðja skiptið sem OECD gerir úttekt á umhverfismálunum hér. Skýrslan var afhent á kynningarfundi á Hótel Natura í morgun og var þar farið yfir helstu atriði hennar.

Í skýrslunni segir að náttúran hér á landi gegni lykilhlutverki í efnahagsbata landsins, bæði vegna orkuauðlinda náttúrunnar og sem aðdráttarafl fyrir erlenda ferðamenn. Íslendingar njóti mikilla lífsgæða og hreins umhverfis sem bjóði  upp á framúrskarandi vatnsgæði, litla loftmengun og mikið aðgengi að óspilltri náttúru. Talið er til tekna að að mótuð hafi verið skýr stefna varðandi stjórnun umhverfismála og sjálfbæra þróun. Íslendingar hafi nálgast umhverfisstjórnun með nýstárlegum hætti, svo sem í fiskveiðistjórnun og nýtingu endurnýjanlegra orkuauðlinda. Gildi fyrir vatns- og loftmengun séu í sögulegu lágmarki og Ísland sé með hæsta hlutfall endurnýjanlegrar orku af öllum þjóðum OECD. Þá hafi landið að geyma einstaka náttúru með óspillt víðerni, hveri, hraunbreiður og jökla sem margir óska eftir því að sjá og upplifa.

Á sama tíma eru helstu áskoranir landsins veik efnahagsstaða smærri sveitarfélaga sem aftrar þeim frá því að fylgja eftir öflugri umhverfisstefnu.