"Alþjóðahagkerfið er á góðu floti en horfurnar gætu verið betri. Það er margt sem ógnar hagvexti um þessar mundir meðal annars hækkandi olíu- og hrávöruverð, vaxandi viðskiptaójafnvægi og hækkandi fasteignaverð." Þetta kemur fram í nýrri skýrslu OECD en stofnunin gefur út ítarlegar skýrslur um horfurnar í heimsbúskapnum tvisvar á ári.
OECD býst við því að hagvöxtur 30 ríkustu landa heims fyrir þetta ár verði 3,1% og 2,9% fyrir næsta ár. Vöxtur verður hinsvegar yfir meðallagi í Japan og í þeim löndum sem eru aðilar að evrunni. Hinsvegar gæti samdráttur í innlendri eftirspurn dregið úr hagvexti á evrusvæðinu seinni hluta árs vegna skattahækkana í Þýsklandi.
OECD býst við að hagvöxtur verði 2,2% á þessu ári en muni svo dragast saman og verða 2,1% árið 2007. Í skýrslunni er sérstaklega bent á að hagvöxtur á evrusvæðinu á næstu misserum verður mjög mismunandi eftir því hvert er litið. Þýskaland mun dregast aftur úr en á sama tíma mun Frakkland og mörg smærri ríkja evrusvæðisins taka við sér og takast að rífa sig upp úr þeirri efnahagslegu lægð sem einkennt hefur Evrópu undanfarin ár. OECD hefur nú hækkað hagvaxtarspá sína fyrir Bandaríkin og býst nú við 3,6% hagvexti á þessu ári samanborið við 3,5% áður en telur að árið 2007 muni hagvöxtur í Bandaríkjunum, líkt og í Evrópu, dragast saman og vera 3,1%, aðallega vegna áhrifa hækkandi olíuverðs.
Hátt olíuverð er komið til að vera
Framfara og efnhagsstofnunin telur að íbúar OECD ríkjanna verði að venjast háu olíverði þar sem litlar líkur eru á því að olíuverð lækki í bráð. OECD útilokar þó ekki að olíverð muni sveiflast töluvert en gerir ráð fyrir að verðið haldist nálægt 70 dollurum á tunnu líkt og nú er.
Í skýrslunni kemur fram mikil óánægja með með getuleysi stjórnvalda OECD ríkjanna til að eiga við sífellt stækkandi viðskiptahalla sem hefur í mörgun löndum náð sögulegu hámarki. OECD varar við því að ójafnvægi af þessari gerð geti orðið til þess að harkalegrar leiðréttingar verði þörf sem gæti haft alvarlegar afleiðingar í för með sér fyrir heimsbúskapinn.
Mikill hagvöxtur í Kína
OECD spáir áframhaldandi hagvexti í Kína og býst við 9,7% hagvexti á þessu ári og 9,5% á því næsta. Að mati OECD er mikilvægt að Kína hækki stýrivexti sína til að leyfa kínverska gjaldmiðlinum renminbi að styrkjast en Kínverjar hafa lengi verið ásakaðir um að halda gjaldmiðli sínum niðri til að bæta samkeppnishæfni sína í alþjóðaviðskiptum.
OECD telur að ódýrar kínverskar vörur hafi hjálpað til við að halda verðbólgu í skefjum í Bandaríkjunum og í Evrópu undanfarin ár en að á næstu mánuðum muni verðbólguþrýstingur aukast verulega vegna verðhækkana á olíu og hrávöru.
