Ólafur Ólafsson, stjórnarformaður Samskipa, hefur eignast asíuhluta Iceland Seafood International, að því er kemur fram í frétt Intrafish. Þar er haft eftir tveimur vel tengdum heimildarmönnum að Ólafur hafi eignast, í gegnum félagið Neptune Holdings BV, 70% hlut Iceland Seafood í fyrirtækinu Asia Seafood.
Helgi Anton Eiríksson, forstjóri Iceland Seafood, staðfestir að Asia Seafood hafi verið selt fyrir rúmum mánuði en vildi hvorki staðfesta né neita því að Ólafur stæði á bak við kaupin.
Ólafur er einn fjögurra einstaklinga sem ákærðir hafa verið fyrir meinta markaðsmisnotkun í hinu svokallaða Al-Thani máli. Hinir þrír eru þeir Sigurður Einarsson, fyrrum stjórnarformaður Kaupþings, Hreiðar Már Sigurðsson, fyrrum forstjóri bankans, og Magnús Guðmundsson, sem var yfir Kaupþingi í Lúxemborg. Ólafur er sjálfur ákærður fyrir hylmingu yfir brotum hinna og peningaþvætti auk þess sem hann er ákærður fyrir markaðsmisnotkun eins og þeir reyndar allir fjórir.
Nánar er fjallað um málið í Viðskiptablaðinu í dag. Áskrifendur geta nálgast blaðið hér að ofan undir liðnum Tölublöð.
© Haraldur Jónasson (VB MYND/HARI)
