Microsoft Íslandi hefur náð samkomulagi við höfuðstöðvar Microsoft um að öll viðskipti íslenskra fyrirtækja og almennings við Microsoft muni miðast við að gengi evrunnar sé 120.
Þetta kemur fram í tilkynningu frá Microsoft á Íslandi.
Þar kemur fram að skráð gengisvísitala Seðlabankans stendur nú í u.þ.b. 174 krónum, sem þýðir að Microsoft mun í viðskiptum sínum við íslensk fyrirtæki ganga út frá því að krónan sé u.þ.b. 31% sterkari en hún raunverulega er, með tilheyrandi kjarabótum fyrir íslenskan efnahag.
„Ástand efnahagslífsins hér á landi er ástæða þessarar breytingar, en þetta er í fyrsta sinn sem Microsoft beitir þessari aðferð við að koma til móts við þjóð í efnahagskreppu,“ segir í tilkynningunni. Þá kemur fram að þau fyrirtæki og stofnanir sem eru með fasta leyfissamninga við Microsoft munu strax finna fyrir sterkara gengi krónunnar í viðskiptum við fyrirtækið. Vel á þriðja þúsund íslenskra fyrirtækja og stofnana eru með slíkan samning, þar á meðal öll stærstu fyrirtæki landsins.
Önnur fyrirtæki og stofnanir munu finna fyrir breytingunni næst þegar Microsoft-hugbúnaður er keyptur eða endurnýjaður. Viðmiðunargengi Microsoft nær líka til neytendahugbúnaðar sem keyptur er í verslunum.
„Microsoft Íslandi hefur trú á íslensku efnahagslífi til lengri tíma, þótt við stöndum frammi fyrir erfiðleikum næstu vikur og mánuði,“ segir Halldór Jörgensson, framkvæmdastjóri Microsoft Íslandi í tilkynningunni.
„Það þurfa allir að leggjast á eitt við að halda atvinnulífinu gangandi og þetta er okkar framlag. Stjórnendur í höfuðstöðvum Microsoft höfðu mikinn skilning á þeirri stöðu sem hér er komin upp og það var afar ánægjulegt að sjá hversu langt þeir voru tilbúnir að ganga til að leggja okkur lið í að taka stöðu með krónunni og þar með íslensku atvinnulífi.“
Fastgengisstefna Microsoft miðast við þriggja mánaða tímabil og verður endurskoðuð að því loknu.
