Ólöf Nordal, þingmaður Sjálfstæðisflokksins í Norðausturkjördæmi, hyggst bjóða sig fram í prófkjöri flokksins í Reykjavík. Þetta kemur fram í fréttatilkynningu frá Ólöfu. Samkvæmt heimildum Viðskiptablaðsins mun hún stefna á 2. sætið í prófkjörinu.
Í tilkynningunni segir að Ólöf hafi tekið sæti á Alþingi efir þingkosningarnar 2007, en þá hafi hún verið í þriðja sæti á lista Sjálfstæðisflokksins í Norðausturkjördæmi.
„Ég er mjög þakklát fyrir það traust sem ég fékk í Norðausturkjördæmi fyrir síðustu kosningar. Ég kom ný á lista flokksins eftir afgerandi stuðning í prófkjöri. Breyting hefur nú orðið á högum fjölskyldunnar á þann veg, að við erum nú flutt úr kjördæminu. Aðalaðsetur fjölskyldu minnar er nú í Reykjavík, þar sem ég er fædd og uppalin og mér finnst því eðlilegt að ég leggi verk mín í dóm sjálfstæðismanna í Reykjavík,” segir Ólöf í tilkynningunni.
Í tilkynningunni segir ennfremur: „Á Alþingi hefur Ólöf gegnt margvíslegum trúnaðarstörfum, m.a. setið í allsherjarnefnd og umhverfisnefnd, auk þess að vera varaformaður samgöngunefndar. Hún situr í háskólaráði Háskólans á Akureyri, stjórn Handverks og hönnunar, er formaður í nefnd á vegum fjármálaráðuneytis um kynbundin launamun og fleira.
Ólöf Nordal er gift Tómasi Má Sigurðssyni, forstjóra Alcoa á Íslandi. Þau eiga fjögur börn á skólaaldri.“
