*

fimmtudagur, 2. apríl 2020
Fólk 16. mars 2020 13:42

Ólöf tekur við stjórn Lykils

Nýr framkvæmdastjóri Lykils, Ólöf Jónsdóttir, hefur starfað hjá Kviku banka þar sem hún bar ábyrgð á fjártæknivörum.

Ritstjórn
Ólöf Jónsdóttir kemur til Lykils frá Kviku banka.
Eyþór Árnason

Ólöf Jónsdóttir hefur verið ráðin framkvæmdastjóri Lykils hf., dótturfélags TM hf., og tekur við starfinu af Lilju Dóru Halldórsdóttur.

Ólöf hefur starfað í hálfan annan áratug á íslenskum fjármálamarkaði. Frá árinu 2017 hefur hún starfað hjá Kviku banka, fyrst sem forstöðumaður stefnumótunar og rekstrarstjórnunar og undanfarið ár sem forstöðumaður fjártækni.

Sem slíkur bar hún ábyrgð á stefnumótun, hönnun og innleiðingu á fjártæknivörum Kviku. Þar áður starfaði hún um árabil sem framkvæmdastjóri hjá Virðingu. Ólöf er véla- og iðnaðarverkfræðingur frá Háskóla Íslands og hefur lokið meistaranámi í aðgerðarfræðum frá London School of Economics.

Sigurður Viðarsson, stjórnarformaður Lykils og forstjóri TM segir það mikinn feng að fá Ólöfu til liðs við samstæðuna.

„Reynsla hennar af hönnun og innleiðingu fjártæknilausna er akkur fyrir félagið í þeirri vegferð sem framundan er í þróun fjölbreyttari fjármálaþjónustu fyrir einstaklinga og fyrirtæki,“ segir Sigurður. „Ég þakka Lilju Dóru fyrir sinn þátt í vexti og velgengi Lykils og óska henni velfarnaðar á nýjum vettvangi.“