Alls bárust 20 umsóknir um samstarfsverkefni til markaðssetningar Íslands á tímabilinu október 2009 til mars 2010.
Starfshópur, sem í sátu fulltrúar Ferðamálastofu, Útflutningsráðs og Höfuðborgarstofu, hefur farið yfir umsóknirnar og samþykkt að ganga til samninga um 6 verkefni að heildarfjárhæð um 170 milljónir króna.
Þau verkefni sem samþykkt var að ganga til samstarfs um voru:
- Icelandair: Winter Campaign Boston - New York - Seattle
- Iceland Express: Markaðsherferð á vefnum í Bretlandi frá október 2009 til mars 2010
- Go To Iceland LLC: Go To Iceland
- Icelandair: Newspaper & Online Campaign - Frankfurt, Paris and Amsterdam
- Iceland Express: Markaðsherferð á vefnum í Skandinavíu frá október 2009 til mars 2010
- Iceland Travel ehf.: Iceland Total
Í tilkynningu frá Ferðamálastofu kemur fram að framlag til samstarfsverkefnanna er 50 milljónir króna. Í auglýsingu, sem birt var 11. september síðastliðinn, var óskað eftir tillögum frá íslenskum ferðaþjónustuaðilum að umræddum samstarfsverkefnum. Verkefni dreifast á meginmarkaðssvæði íslenskrar ferðaþjónustu í Bretlandi, á meginlandi Evrópu, í N-Ameríku og á Norðurlöndum. Þar kom jafnframt fram að mótframlag umsóknaraðila skyldi vera að lágmarki tvöfalt hærra en framlag Ferðamálastofu (2 kr. á móti einni).
Lágmarksframlag til eins verkefnis miðaðist við 5 milljónir króna og hámarksframlag til eins verkefnis 10 milljónir króna.
„Að teknu tilliti til mótframlags í þeim verkefnum sem samþykkt voru er ljóst að framlag til átaksins fullnýtist,“ segir í tilkynningunni en að að viðbættu mótframlagi umsóknaraðila er heildarupphæð átaksins 170 milljónir króna, sem fyrr segir.
Öll verkefnin snúast um kynningu í formi auglýsinga í prentmiðlum og/eða á vefnum á því tímabili sem um ræðir og uppfylltu einnig önnur þau skilyrði sem fram komu í auglýsingunni um verkefnið.