*

föstudagur, 10. júlí 2020
Innlent 27. febrúar 2020 07:01

Opna aftur í Boston

Icelandair hefur endurvakið söluskrifstofu sína í Boston eftir að henni var lokað árið 2017.

Ritstjórn
Birna Ósk Einarsdóttir, framkvæmdastjóri sölu og þjónustusviðs Icelandair.
Eyþór Árnason

Bogi Nils Bogason forstjóri og Birna Ósk Einarsdóttir, framkvæmdastjóri sölu- og þjónustusviðs Icelandair Group munu í dag opna formlega nýja söluskrifstofu fyrirtækisins í Boston í Bandaríkjunum en fjöldi starfsmanna verður á bilinu 15-20. 

Árið 2017 lokaði Icelandair söluskrifstofu sinni í Boston auk flestra annarra söluskrifstofa á erlendri grundu en stjórnendur félagsins hafa viðurkennt að lokanirnar hafi verið mistök. Skrifstofan í Boston verður sú fyrsta sem Icelandair opnar frá því þeim var lokað árið 2017.

Í viðtali við Viðskiptablaðið frá því í septeber á síðasta ári sagði Birna m.a að með sterkari nærveru félagsins á lykilsvæðum fengi félagið betra samband við þá aðila sem eru tryggustu viðskiptavinir félagsins: 

„Það sem við hins vegar fáum með sterkri nærveru á lykilsvæðum er samband við ferðaskrifstofurnar, heildsalana og fyrirtækin sem eru í rauninni okkar tryggustu viðskipavinir þar sem þeir kaupa hvað lengst fram í tímann og eru að koma með hópa inn í vélarnar og til Íslands. Það samband raknaði aðeins upp en við höfum nú byggt það upp aftur. Sú vinna gengur vel þar sem það er búið að færa ákveðinn hluta þessara verkefna aftur á sölusvæðin.“

Stikkorð: Icelandair Boston