Fljótsdalshérað, AFL starfsgreinafélag, Austurbrú og AN Lausnir hafa gert samkomulag um frumkvöðlasetrið Hugvang á Egilsstöðum. Þetta kemur fram í fréttatilkynningu.

Framkvæmdastjóri AN Lausna, sem hýsa setrið, segir mikla eftirspurn eftir stuðningi við fólk með hugmyndir.

„Við höfum rými og þekkingu innanhúss til að aðstoða fólk við að koma hugmyndum sínum í framkvæmd. Við fáum mikið af fólki með hugmyndir hingað inn en höfum hins vegar ekki ein og sér bolmagn til að taka við verkefnunum og halda utan um það. Þess vegna er frábært að fá þessa aðila að borðinu,“ segir Erlingur Þórarinsson, framkvæmdastjóri AN Lausna.

Um er að ræða þrjú vinnurými í Hugvangi sem hýsti áður skrifstofur Kaupfélags Héraðsbúa en hefur í tvö ár hýst starfsemi þekkingarfyrirtækja á borð við AX North, AN Lausnir, Austurnet og Austurfrétt.

Umgjörð sem hvetur fólk með hugmyndir áfram

Samstarfsaðilarnir skipa saman stjórn og Austurbrú leggur til verkefnastjóra sem aðstoðar frumkvöðlana. Björn Ingimarsson, bæjarstjóri Fljótsdalshéraðs, vonast til að samstarfið verði árangursríkt.

„Hugsunin er að búa til umgjörð sem hvetur fólk með hugmyndir áfram og veitir því nauðsynlega aðstoð til að þær verði að veruleika.“

Björn segir einnig mikilvægt að ábyrgðinni sé dreift á milli aðila. „Hugvangur hefur sjálfstæða stjórn og lítur ekki pólitík eða stefnu ákveðins aðila. Ég held að það skipti máli að setrið sé óháð.“

Unnið eftir kúluhugmyndafræði

Í setrinu er unnið eftir svokallaðri kúluhugmyndafræði sem þróuð hefur verið af fyrirtækjunum sem þegar eru á hæðinni.

Kúla er afmarkað verkefni sem hefur fjárhagslegt og verkefnalegt sjálfstæði. Hver aðili leggur sitt í púkkið, hvort sem það er vinna eða tæki, og síðan er stóra verkefninu skipt upp í smærri verkþætti sem kallaðir eru sprettir.

Að loknum hverjum spretti er staðan tekin og metið hvort haldið verði áfram með verkefnið. „Kosturinn við kúlumyndafræðina er að menn æða ekki út í að stofna fyrirtæki til að prófa hugmynd. Við höfum dæmi um fyrirtæki hér á hæðinni eins og AN Lausnir og Austurfrétt sem byrjuðu sem lítil verkefni/kúlur milli nokkurra einstaklinga en eru nú orðin að fyrirtækjum,“ útskýrir Erlingur.

Auglýst hefur verið eftir frumkvöðlum sem vilja nýta sér aðstöðuna. Þeir verða síðan boðaðir í viðtöl og umsóknirnar metnar í kjölfarið.