Rökstuðningur peningastefnunefndar fyrir 75 punkta lækkun stýrivaxta var töluvert frábrugðin því sem almennt var búist við. Gríðarlegur söluþrýstingur skapaðist á skuldabréfamarkaði eftir kynningarfund bankans klukkan 11 í morgun.

„Ekki er hægt að segja annað en orð Seðlabankastjóra hafi farið öfugt í markaðinn,“ segir í Markaðspunkti greiningardeildar Arion banka sem fjallar um ákvörðun bankans. „Til að mynda hefur krafa langra verðtryggðra ríkisbréfa hækkað um 44-90 punkta sem er eitt hið mesta söluóðagot sem minnugir menn á skuldabréfamarkaði muna eftir.“

Ýjað að hægari vaxtalækkun

Greiningardeild Arion banka segir að í yfirlýsingu peningastefnunefndar sé nú notað veikara orðalag áður. Þannig notar bankinn orðalagið „eitthvert svigrúm“ sé til staðar til vaxtalækkana.

„Seðlabankinn ýjar þannig að hægari vaxtalækkunum, þrátt fyrir að hagvöxtur og fjárfesting hafi mælst minni á öðrum ársfjórðungi en reiknað hafði verið með, verðbólga hafi verið lægri en reiknað hafi verið með, ljóst sé að álver í Helguvík muni frestast eða verði hreinlega tekið út af dagskránni og svo framvegis. Með öðrum orðum: þótt allt bendi til þess að lægðin í efnahagslífinu verði lengri en reiknað var með á síðasta vaxtaákvörðunarfundi. Þess í stað er öll áhersla bankans á afnámi hafta sem skýrist líklega af því að helstu skilyrði bankans fyrir afnámi hafta eru að þokast í rétta átt. (gengisdómurinn, þriðja endurskoðun AGSS og lausn IceSave).“

Kauphlaup og hringhugaháttur

Í Markaðskorni segir að ýmsir sjái misvísandi yfirlýsingar Seðlabankans undanfarið sem hringhugahátt. Bankinn hafi sagt að ekki sé hægt að stíga meira en hænufet til lækkunar vaxta vegna óvissu vegna Icesave, gengislána og fleiri mála. Hann segi hinsvegar að svigrúm til lækkunar sé takmarkað þegar eitthvert af málunum leysist, vegna þess að afnám hafta sé rétt að fara að gerast. „Þegar litið er til baka sést að vaxtalækkanir Seðlabankans hafa að miklu verið línulegur ferill sem vart hnikast til vegna frétta eða atburða, góðra eða slæmra.“

Spá 100 punkta lækkun fram til ársloka

„Miðað við hinn nýja tón sem ríkir hjá peningastefnd býst Greiningardeild við lækkun stýrivaxta sem nemur 100 punktum fram til ársloka. Samkvæmt því myndu vextir á viðskiptareikningum innlánastofnana lækka úr 4,75% í 3,75% og veðlánavextir lækka úr 6,25% í 5,25%.

Miðað við lélegar hagvaxtartölur að undanförnu og ofmat Seðlabankans á hagvexti næstu ára (vegna of mikillar bjartsýni um stóriðjuframkvæmdir) ásamt því sem verðbólguhorfur eru afar jákvæðar mætti þó halda því fram að slíkt vaxtastig sé enn of hátt.“