Orkuveita Reykjavíkur tekur 80 milljón dala, eða sem samsvarar 10,8 milljörðum íslenskra króna lán vegna viðspyrnuverkefna í faraldrinum. Viðskiptablaðið sagði frá því fyrr í mánuðinum að Orkuveitan hefði aukið hagnað sinn um 600 milljónir króna milli ára, í 1,6 milljarða á þriðja ársfjórðungi ársins.
- Sjá einnig: Högnuðust um 32 milljarða
Þess má geta að aðaleigandi fyrirtækisins, Reykjavíkurborg, var með neikvæða afkomu upp á milljarð fyrstu 9 mánuði ársins þegar áætlanir höfðu gert ráð fyrir 11 milljarða króna afgangi.
Félagið hafði þá fjárfest fyrir 11,4 milljarða króna á tímabilinu en félagið ákvað síðasta vetur að fara í viðamiklar viðspyrnufjárfestingar vegna áhrifa kórónuveirufaraldursins með viðhaldsverkefnum og stækkun veitukerfa.
- Sjá einnig: Endurbótum höfuðstöðva OR ljúki 2023
Norræni fjárfestingarbankinn (NIB) veitir Orkuveitur Reykjavíkur lánið, sem er til 15 ára, til að fjármagna fjárfestingaráætlun við að bæta jarðvarmavinnslu og dreifikerfi raforku á Íslandi.
Rafvæðing hafnarsvæðis til að spara díselolíu
Lánið, sem hljóðar upp á 80 miljónir dollara (67,52 miljónir evra) mun að hluta fjármagna nýjar viðbótar- og niðurdælingarholur, nýjar tengingar á gufulögnum, nýja verkstæðisbyggingu sem og stækkun á stöðvarhúsi gufuaflsvirkjunarinnar á Hellisheiði.
Borun á viðbótarholum er reglubundinn aðgerð til að viðhalda afköstum jarðvarmavirkjana. Í Nesjavallavirkjun felast verkefnin einkum í að bora nýjar viðbótarholur, að uppfæra heildarstýrikerfi og skipta út búnaði í gufuaflsstöðvum.
Lánið verður jafnframt notað til að fjármagna endurbætur á raforkudreifikerfinu, endurnýja gamlan búnað í dreifikerfinu, rafvæða hafnarsvæði og uppsetningu snjallmæla. Rafvæðing hafnarinnar gerir notendum kleift að tengja skip við rafmagn í landi og þar með draga úr mengun frá skipum sem ganga fyrir dísilafli þegar þau liggja við festar.
Raforkuafköst Orkuveitunnar nema 431 MW
Orkuveita Reykjavíkur sér viðskiptavinum sínum fyrir rafmagns-, fjarhita-, drykkjarvatns-, frárennslis- og ljósleiðarakerfi. Í lykilþáttunum, rafveitu og fjarhitun, þjónar fyrirtækið meira en helmingi íbúa Íslands.
Fyrirtækjasamstæðan á og rekur þrjú orkuver, jarðvarmaorkuver á Nesjavöllum og Hellisheiði og vatnsaflsvirkjunina Andakílsárvirkjun, með samanlögð raforkuafköst upp á 431 MW. Orkuveita Reykjavíkur er í eigu Reykjavíkurborgar (93,54%), Akraneskaupstaðar (5,53%) og Borgarbyggðar (0,93%).
Norræni fjárfestingarbankinn er alþjóðleg fjármálastofnun í eigu aðildarlandanna átta: Danmerkur, Eistlands, Finnlands, Íslands, Lettlands, Litháens, Noregs og Svíþjóðar.
Bankinn lánar til opinberra verkefna og einkaverkefna jafnt innan sem utan aðildarríkjanna. NIB er með hæsta mögulega lánshæfismatið, AAA/Aaa, hjá leiðandi lánshæfismatsstofnununum Standard & Poor’s og Moody’s.