Í tilkynningu frá Þorsteini M. Jónssyni, stjórnarformanns Vífilfells kemur fram að rangt sé að Coca-Cola hafi haft í hótunum við Nýja Kaupþing eins og haldið var fram í fréttum og Fréttaauka Ríkissjónvarpsins í gærkvöldi.
Þá segir Þorsteinn einnig að ekki standi til að afskrifa skuldir sem tengjast Vífilfelli, rekstur félagsins sé í góðu horfi þó hrun íslenska efnahagslífsins hafi sett sitt mark á félagið og eigendur þess.
Tilkynningin frá Þorsteini er hér birt óbreytt í fullri lengd:
„Það er rangt að til standi að afskrifa skuldir sem tengjast Vífilfelli eða eignarhaldi á því. Síðastliðnar vikur hafa átt sér stað uppbyggilegar viðræður við Nýja Kaupþing sem miða að fullum efndum allra skulda við bankann sem tengjast Vífilfelli og eignarhaldi á því.
Rekstur Vífilfells er í góðu horfi sem fyrr, en hrun íslensks efnahagslífs hefur að sjálfsögðu sett sitt mark á félagið og eigenda þess.
Það er ennfremur alrangt að fulltrúar Coca-Cola fyrirtækisins hafi haft í hótunum við Nýja Kaupþing eins og haldið er fram af ríkissjónvarpinu. Fulltrúar Coca-Cola hafa komið að viðræðum við Nýja Kaupþing og lagt gott eitt til.
Leiðarljós allra aðila, eigenda Vífilfells, fulltrúa Coca-Cola, og Nýja Kaupþings, er að tryggja áframhaldandi farsælan rekstur Vífilfells og þar með störf á þriðja hundrað starfsmanna fyrirtækisins.
Það er harmað að mál skuli sett fram með þeim hætti sem gert var af fréttastofu RÚV í gær, sérstaklega í ljósi þess að ofangreindar staðreyndir höfðu verið skýrðar út fyrir fréttamanni RÚV.
Virðingarfyllst,
Þorsteinn M. Jónsson
Stjórnarformaður“
