Í gær var klárað að sprengja næst síðustu sprenginguna í veghluta Bolungarvíkurganganna. Rúnar Ágúst Jónsson staðarstjóri Ósafls segir að eftir sprenginguna hafi opnaðast á milli jarðgangahlutanna sem ekki stóð til að sprengja fyrr en laugardaginn 28. nóvember.
„Ástæðuna má rekja til þess að mjög veik setlög í efri hluta stafns ganganna gáfu eftir. Vegna öryggis starfsmanna var ákveðið að ljúka við að sprengja það sem eftir var, styrkja loft og veggi svo ekki stafaði hætta á frekara hruni.
Framundan er frekari sprengivinna í síðasta útskoti ganganna ásamt bergstyrkingum svo hægt verði að bjóða gestum að skoða göngin á öruggan hátt þegar síðasta sprengihleðslan í verkinu verður sprengd og þessum stóra áfanga fagnað þann 28. nóvember,” segir Rúnar.