Stjórn Bændasamtaka Íslands hefur ákveðið að óska eftir formlegum tilboðum í fasteign og rekstur Hótel Sögu. Þetta kemur fram í fréttatilkynningu frá samtökunum. Fyrirtækjaráðgjöf MP banka hefur verið ráðin til að annast söluferlið. Endanleg ákvörðum um sölu verður tekin af Búnaðarþingi en í ljósi mikils áhuga á starfsemi hótelsins var það mat stjórnar að rétt væri að kanna áhuga fjárfesta með þessum hætti.
Hótelið er í eigu Hótel Sögu ehf. sem er 50 ára gamalt fyrirtæki í eigu Bændasamtaka Íslands. Á hótelinu eru 209 herbergi, tíu funda- og veislusalir og tveir veitingastaðir. Þar starfa um 100 manns. Fasteign Hótel Sögu ehf. við Hagatorg er um 19.000 fermetrar að stærð og hýsir hótelstarfsemi, veitingastaði, banka, hárgreiðslustofu, líkamsræktarstöð o.fl. Skrifstofur Bændasamtaka Íslands eru á þriðju hæð fasteignarinnar.
Í fréttatilkynningunni segir Sigurgeir Sindri Sigurgeirsson, formaður Bændasamtakanna að samhliða miklum vexti í ferðaþjónustu hafi rekstur Hótel Sögu gengið vel og að áætlanir bendi til þess að enn meiri aukning verði í fjölda ferðamanna. Samtökin vilji leita allra leiða til að ávaxta eignir sínar með viðunandi hætti og að nú sé rétti tíminn til að skoða hvort hagfellt sé að selja hótelreksturinn.