Óskar Bergsson, rekstrarfræðingur og húsasmíðameistari, leiðir lista Framsóknarflokksins í Reykjavík fyrir borgarstjórnarkosningarnar næsta vor. Óskar er ekki ókunnur borgarmálunum en hann tók við sem borgarfulltrúi eftir að Björn Ingi Hrafnsson hætti árið 2007. Óskar sóttist eftir oddvitasætinu á lista flokksins árið 2010 en náði því ekki.

Tilkynnt var um lista flokksins í dag en á vef Framsóknarflokksins segir að kjördæmaþing framsóknarfélaganna í Reykjavík hafi samþykkt tillögu kjörstjórnar um skipan í efstu sjö sæti framboðslista fyrir sveitarstjórnarkosningarnar.

Þá segir á vef flokksins að skipulagsmál verði ofarlega á baugi svo þróun borgarinnar verði til hagsbóta fyrir Reykvíkinga, ekki bara suma. Liður sé staðsetning flugvallarins í Reykjavík og verði að tryggja núverandi staðsetningu hans ef borgin á að þjóna hlutverki sínu sem höfuðborg allra landsmanna.

Skipulagsmál eru umhverfismál og þau verður að nálgast með umræðu við þá sem í borginni búa. Skipuleggja þarf borgina þannig að búseta nærri vinnustað sé raunhæfur möguleiki. Sem dæmi má nefna að tæp 80% af öllum störfum í Reykjavík eru í vestur hluta hennar, þessu þarf að breyta.

Sjö efstu sætin á lista Framsóknarflokksins í borginni eru eftirfarandi:

  1. Óskar Bergsson, rekstrarfræðingur og húsasmíðameistari
  2. Guðrún Bryndís Karlsdóttir, sjúkraliði og verkfræðingur
  3. Valgerður Sveinsdóttir, lyfjafræðingur
  4. Guðlaugur Gylfi Sverrisson, vélfræðingur
  5. Hafsteinn Ágústsson, kerfisstjóri
  6. Hallveig Björk Höskuldsdóttir, öryggisstjóri
  7. Trausti Harðarson, viðskiptafræðingur