„Við erum taldir vera stór aðili á þessum markaði núna, en það hefur tekið tíma að vinna það inn.“ Þetta sagði Jón Sigurðsson, forstjóri Össurar, um stöðu og framtíðarhorfur á uppgjörsfundi félagsins.
Eins og hefur komið fram birti Össur uppgjör sitt fyrir annan fjórðung í morgun. Hagnaður félagsins á tímabilinu nam 3,9 milljónum Bandaríkjadala, sem samsvarar um 313 milljónum íslenskra króna m.v. gengi dagsins í dag. Meðalspá greiningardeilda var 5,8 milljón dollara hagnaður og er hagnaður því nokkuð undir spám.
Aftur á móti hefur hagnaður félagsins aukist gríðarlega, sé miðað við sama tímabil árið 2007, en hann hefur aukist um 160% séu fjórðungarnir bornir saman.
Samkvæmt stjórnendum félagsins eru markaðshorfur góðar fyrir komandi misseri. „Markaðurinn sem við störfum á er fremur stöðugur, og þau mál sem við glímum við nú aðallega innanhúsmál. Það eru góðar fréttir,“ sagði Jón Sigurðsson. Áhersla stjórnenda félagsins er nú sett á að auka arðsemi í rekstri eftir mikinn ytri vöxt að undanförnu. Til stendur að markaðssetja allt að 7 nýjar vörur það sem eftir er af árinu.
Á fundinum kom fram að sala í Asíu sé mjög góð, og að aukast töluvert. Aftur á móti sé salan í Bandaríkjunum vonbrigði. Von sé þó um að hún fari batnandi.
Forstjórinn sagði ennfremur að miklir samþættingar- og sparnaðarmöguleikar væru fyrir hendi í náinni framtíð.
„Össur er sterkt fyrirtæki og með heilbrigðan efnahagsreikning,“ sagði forstjórinn einnig á uppgjörsfundinum sem haldinn var á Grand Hótel og lauk nú fyrir skömmu.
Ítarlegri umfjöllun um uppgjörið verður í Viðskiptablaðinu á morgun.