Óttar Guðjónsson, framkvæmdastjóri Lánasjóðs sveitarfélaga, var annar tveggja umsækjenda um embætti forstjóra FME, sem taldir voru bera af öðrum umsækjendum. Í skýrslu stjórnar Fjármálaeftirlitsins segir að tveir einstaklingar hafi fengið áberandi hæsta einkunn í mati matsnefndar.
Samkvæmt heimildum Viðskiptablaðsins var Óttar annar þeirra, en Unnur Gunnarsdóttir, sem að lokum hlaut stöðuna, var hinn.
Þrátt fyrir þetta er sérstaklega tekið fram að fjórir aðrir umsækjendur, sem komu í viðtal hjá matsnefndinni, höfðu góða menntun og styrkleika í mismunandi þáttum. Enginn þessara fjögurra hefði þó samanlagða styrkleika sem teldust sambærilegir við styrkleika Óttars og Unnar. Bæði voru þau talin mjög vel hæf til að gegna starfinu.
Stjórn FME fékk svo kynningu frá þeim báðum á framtíðarsýn þeirra fyrir eftirlitið og átti samtöl við þá um helstu þætti sem eru að mati stjórnar mikilvægir með tilliti til hlutverks FME. Stjórnin kannaði ennfremur hvort umsækjendurnir væru til skoðunar vegna mála sem tengjast hruninu eða annarra mála hjá FME eða sérstökum saksóknara og svo reyndist ekki vera.
Niðurstaða stjórnarinnar var hins vegar sú að Unnur hefði sýn og áherslur, sem væru í bestu samræmi við sýn og áherslur stjórnar FME.
