Sumir óttast nú að útistöður Póllands við Evrópusambandið gætu leitt þau á braut sem endar með útgöngu landsins úr sambandinu. Pólland og Ungverjaland hafa hótað að beita 1.820 milljarða evra fjárlög sambandsins fyrir næstu sjö ár neitunarvaldi, og halda þannig sambandinu í gíslingu.
Ríkisstjórn Laga og réttar-flokksins, undir forystu Jaroslaw Kaczynski, þvertekur fyrir að hafa nokkurn hug á útgöngu, enda aðild Póllands að ESB afar vinsæl þar í landi. Gagnrýnendur óttast hinsvegar að haldi ósættið áfram að stigmagnast gæti það hrint af stað atburðarás sem erfitt væri að stöðva.
Fjárlögin umdeildu fela í sér nýjar reglur þess efnis að sambandið geti lokað á fjárveitingar til aðildarríkja sem brjóta gegn réttarríkinu. Pólland og Ungverjaland hafa sem fyrr segir hótað að beita neitunarvaldi vegna þessa, en bæði hafa löndin grafið undan sjálfstæði réttarkerfis og fjölmiðla síðustu ár, undir stjórn þjóðernissinna.
Áhyggjuraddir má einnig finna í Ungverjalandi, en þó hljóðlátari. Ríkisstjórn Viktors Orban þar í landi hefur gagnrýnt ráðamenn í Brussel og talað um þá sem erindreka erlends stjórnvalds sem beiti landið ofríki. Pólskir leiðtogar hafa hinsvegar gengið skrefinu lengra og líkt sambandinu við Sovétríkin sálugu, auk þess að lýsa stöðu landsins innan sambandsins sem „pólitískum þrældóm“.