Forsvarsmenn Íbúðalánasjóðs funda þessa dagana með fulltrúum Fjármálaráðuneytisins, Fjármálaeftirlitsins og Seðlabankans varðandi óverðtryggð lán Íbúðalánasjóðs. Eins og greint hefur verið frá stefnir Íbúðalánasjóður á að bjóða óverðtryggð lán og hefur Sigurður Erlingsson forstjóri sjóðsins sagt að fyrirkomulagið verði ólíkt því sem bankarnir hafa boðið. „Nú erum við á þessu lokastigi og stjórnum raunar minnstu um þennan hluta. Við erum að kynna þetta fyrir stjórnvöldum og bíðum eftir grænu ljósi,“ segir Sigurður. Hann vill lítið gefa upp um það fyrirkomulag á lánum sem sjóðurinn kynnir nú fyrir yfirvöldum þar sem mögulegt er að breytingar verði á þeim í ferlinu. Sigurður segist heldur búast við að það dragi til tíðinda í seinni hluta þessa mánaðar eða í byrjun næsta.