Veitingahúsið Perlan sagði upp 35 starfsmönnum í september og verður öðru starfsfólki sagt upp eftir því sem á líður og uppsagnarfrestir krefjast.
Ástæðan fyrir uppsögnunum er sú, að veitingahúsið, sem borið hefur fram hágæða mat á efstu hæð Perlunnar og í kaffiteríunni á 4. hæð, hættir starfsemi í byrjun nýs árs eftir rúmlega 25 ára veitingarekstur. Í staðinn munu koma verslanir með útivistarfatnað og minjagripi og kaffihús.
Að jafnaði hafa um 100 manns starfað á veitingahúsinu í 60-70 stöðugildum. Veitingahúsið lokar um áramót meðal annars vegna hækkandi leigu. Perlunni er gert að rýma húsið fyrir 10. janúar 2017, og verða allar innréttingar og búnaður sem tilheyra veitingarekstrinum fjarlægðar.