Persónuafsláttur hækkar í samræmi við hækkun vísitölu neysluverðs um áramótin í samræmi við lög um tekjuskatt. Persónuafsláttur á næsta ári verður því 623.042 krónur, eða 51.920 krónur á mánuði og hækkar um 12.217 krónur milli ára.
Skattleysismörk tekjuskatts og útsvars verða samkvæmt því 145.659 kr. á mánuði að teknu tilliti til 4% lögbundinnar iðgjaldsgreiðslu launþega í lífeyrissjóð samanborið við 142.153 kr. á mánuði 2015. Hækkunin milli ára nemur 2,5%.
Skattþrepum fækkar í tvö
Skatthlutfall í lægri tveimur skattþrepunum mun lækka. Í fyrsta þrepi mun skatthlutfallið lækka um 0,18 prósentustig, úr 22,86% í 22,68%. Skatthlutfallið í öðru þrepi lækkar um 1,4 prósentustig, úr 25,3% í 23,9%. Skatthlutfallið í þriðja og efsta þrepinu helst óbreytt í 31,8%. Athygli skal vakin á því að við þetta skatthlutfall bætist við útsvar sveitarfélaga. Þrepamarkið upp í þriðja þrep mun einnig lækka í 770.000 krónur á mánuði.
Staðgreiðsluhlutfall ársins 2016 í heild, þ.e. bæði vegna tekjuskatts og útsvars verður þríþætt eftir fjárhæð tekna, þ.e. 37,13% á tekjur í fyrsta þrepi, 38,35% á tekjur í öðru þrepi og 46,25% á tekjur í þriðja þrepi.
Tekjuskattur verður lagður á í þremur þrepum í síðasta sinn á árinu 2016.
Tryggingagjald lækkar
Tryggingagjald mun lækka um áramót um 0,14 prósentustig milli ára. Eftir áramót verður skipting tryggingagjald sem hér segir:
- Almennt tryggingagjald 5,90%
- Atvinnutryggingagjald 1,35%
- Gjald í Ábyrgðarsjóð launa vegna gjaldþrota 0,05%
- Markaðsgjald 0,05%
- Samtals til staðgreiðslu 7,35%
