Pink Star demanturinn er nú dýrasti demantur heims, en hann var seldur á uppboði í dag á 71,2 milljónir dollara.
Fjallað er um uppboðið í The Telegraph, en uppboðið var haldið hjá Sotheby í Hong Kong.
GIA hafði metið þennan 59,60 karata demant á 60 milljónir dala, sem var örlítið fyrir ofan Oppenheimer demantinn Blue diamond.
Blue diamond fór á 57,7 milljónir dala síðasta maí á uppboði hjá Christie's í Genf í Sviss.
Pink Star er ekki einungis dýrasti demantur sem seldur hefur verið á uppboði, heldur hefur aldrei neitt farið fyrir slíkar upphæðir í Asíu.
Demanturinn var skorinn af 132,5 karata demanti sem fannst í De Beers námunni árið 1999, en það tók tvö ár að slípa steininn og að koma honum í það ástand sem hann er í í dag.
Árið 2013 reyndi skartgripasalinn Isaac Wolf að kaupa Pink Star á 83 milljónir dollara á uppboði í Genf, en hann varð stuttu síðar gjaldþrota og gat því ekki staðið við kaupin.