*

föstudagur, 7. ágúst 2020
Innlent 28. nóvember 2013 13:36

Píratar sofa verr og stunda síður líkamlegar íþróttir

MMR hefur kannað heilsuvenjur Íslendinga.

Ritstjórn
Haraldur Guðjónsson

Þeir sem styðja Pírata og Bjarta framtíð vakna síður endurnærðir en þeir sem styðja aðra stjórnmálaflokka, samkvæmt niðurstöðum könnunar MMR á heilsuvenjum Íslendinga. Í könnuninni kemur fram að rúmur helmingur landsmanna borðar hollan morgunverð á borð við ávexti og grænmeti svo til dagslega. Af þeim sem tóku afstöðu sögðust 62,7% taka þátt í uppbyggjandi samveru með öðru fólki nokkrum sinnum í viku eða oftar, 62,3% sögðust vakna endurnærð nokkrum sinnum í viku eða oftar og 52,0% sögðust taka þátt í líkamlegum íþróttum nokkrum sinnum í viku eða oftar.

Þá kemur fram í niðurstöðum könnunarinnar að hærra hlutfall kvenna en karla sagðist borða ávexti og/eða grænmeti nokkrum sinnum í viku eða oftar. Af þeim sem tóku afstöðu sögðust 90,5% kvenna ávexti og/eða grænmeti nokkrum sinnum í viku eða oftar, borið saman við 73,3% karla.

Stuðningsfólk VG sefur best

Hlutfall þeirra sem sögðust vakna endurnærð nokkrum sinnum í viku eða oftar var hærra meðal eldri en yngri þátttakenda. Af þeim sem tóku afstöðu og tilheyrðu yngsta aldurshópnum (18-29 ára) sögðust 56,3% vakna endurnærð nokkrum sinnum í viku eða oftar, 56,6% á aldrinum 30-49 ára, 70,3% á aldrinum 50-67 ára og 81,2% þeirra sem tilheyrðu elsta aldurshópnum (68 ára og eldri) sögðust vakna endurnærð nokkrum sinnum í viku eða oftar.

Þeir sem sögðust styðja Pírata og Bjarta framtíð sögðust síður vakna endurnærð nokkrum sinnum í viku en þeir sem sögðust styðja aðra stjónmálaflokka. Af þeim sem tóku afstöðu og sögðust styðja Pírata sögðust 48,9% vakna endurnærð nokkrum sinnum í viku eða oftar og 51,7% þeirra sem sögðust styðja Bjarta framtíð. Til samanburðar sögðust 68,2% þeirra sem styðja Vinstri-græn vakna endurnærð nokkrum sinnum í viku eða oftar og 67,6% af þeim sem sögðust styðja Sjálfsstæðisflokkinn.

Um helmingur í íþróttum

Hlutfall þeirra sem sögðust styðja Pírata og taka þátt í líkamlegum íþróttum nokkrum sinnum í viku eða oftar var nokkuð lægra en hlutfall þeirra sem sögðust styðja aðra stjórnmálaflokka og taka þátt í líkamlegum íþróttum nokkrum sinnum í viku eða oftar. Af þeim sem tóku afstöðu og sögðust styðja Pírata sögðust 36,6% taka þátt í líkamlegum íþróttum nokkrum sinnum í viku eða oftar, borið saman við 56,5% þeirra sem sögðust styðja Bjarta framtíð og 56,0% þeirra sem sögðust styðja Vinstri-græn.

MMR gerði könnunin dagana 30. október til 1. nóvember 2013 og var heildarfjöldi svarenda 963 einstaklingar 18 ára og eldri.

Stikkorð: Heilsa MMR