Prentmet tók í dag upp eineltisáætlun samkvæmt Olweusarverkefninu gegn einelti. Ekki er vitað um önnur fyrirtæki sem hafa tekið þessa áætlun upp.
„Það hefur alltaf verið í starfsmannastefnu Prentmets að starfsmenn sýni samstarfsfólki sínu kurteisi og virðingu í samskiptum. Einelti og kynferðisleg áreitni verður undir engum kringumstæðum umborin á vinnustaðnum. Meðvirkni starfsmanna í einelti er fordæmd. Að vinna gegn einelti og að bættum brag er hluti starfsmannastefnu fyrirtækisins. Mikilvægt er að starfsfólk upplifi alltaf að það sé öruggt í fyrirtækinu,“ segir í tilkynningu frá Prentmeti.
Þorlákur Helgason framkvæmdastjóri Olweusarverkefnisins gegn einelti hefur komið að þjálfuninni og aðstoðað við gerð áætlunarinnar.
