Vladimír Pútin Rússlandsforseti skoraði átta mörk í íshokkíleik, sem haldinn var í Sochi í Rússlandi í gær.
Með Pútin í liði voru fyrrverandi leikmenn í NHL íshokkídeildinni í Norður Ameríku og skoraði Pútin, sem er 62 ára gamall, flest mörkin eftir stoðsendingar frá atvinnumönnunum fyrrverandi Pavel Bure og Valeri Kamenski, að því er segir í frétt Sports Illustrated.
Varnarmálaráðherra Rússlands, sem var í sama liði, skoraði þrjú mörk í leiknum, sem fór 18-6 fyrir liði Pútins.
Stutt er síðan Pútin hóf að spila íshokkí, en hann er duglegur við að sýna íþróttahæfileika sína. Í grein Sports Illustrated er þeirri spurningu velt upp hvort Rússland hefði frekar átt að tefla fram stjórnmálamönnum í Ólympíuleikunum í fyrra, þar sem rússneska liðið tapaði fyrir Finnlandi 3-1 í átta liða úrslitum.
