Um tíma var um það rætt að banna ætti endurskoðunarfyrirtækjum alfarið að veita skattaráðgjöf og aðra ráðgjöf, þ.e. að þau ættu aðeins að sinna endurskoðunarvinnu. „Sem betur fer var það ekki gert, enda mjög mikilvægt að varðveita og viðhalda þessari miklu og verðmætu þekkingu sem skapast hefur í endurskoðunarfyrirtækjum,“ segir Sigurður Páll Hauksson, nýr forstjóri Deloitte.

Hann var í ítarlegu viðtali í síðasta tölublaði Viðskiptablaðsins. Þar sagði hann að við endurskoðun hjá stórum fyrirtækjum þurfi endurskoðendur að hafa aðgang að sérhæfðri þekkingu sem gott er að búa yfir innanhúss. Þessi 70% regla varðandi ráðgjöf til félaga tengdra almannahagsmunum getur einnig haft það í för með sér að viðskiptavinurinn sjái sér hag í því að kaupa endurskoðun frá einu fyrirtæki og ráðgjöf frá öðru, enda setur reglan takmörk á það hvað sama fyrirtækið má aðstoða fyrirtækið mikið. Reglan getur því breytt landslaginu hér eitthvað.

Fylgja ferðaþjónustunni

Hjá Deloitte er ráðgjöfin um fjórðungur af starfsemi fyrirtækisins þegar horft er til tekna, að sögn Sigurðar.

„Deloitte er er engu að síður tiltölulega stórt á þeim markaði. Við höfum lagt áherslu á að auka þennan hluta rekstursins og vaxa þar. Til dæmis settum við nýlega á fót sérstakt svið í upplýsingatækni- og öryggisráðgjöf. Þar eru mörg tækifæri, enda eru þessi upplýsingaöryggismál í raun þjóðaröryggismál. Það mun taka tíma fyrir fyrirtækin að ákveða hversu mikla áherslu þau vilja leggja á þessi mál, en ég tel að það sé alltaf betra að taka ráðin í sínar eigin hendur í tíma í stað þess að bíða eftir áföllunum. Upplýsingatæknisvið hefur verið rekið hjá Deloitte Global í nokkurn tíma og erum við að fylgja þar góðu fordæmi. Í þessari þjónustu felst líka staðfesting á því að stöðlum sé fylgt. Þá gerum við öryggisprófanir á tölvukerfum og erum með tölvuhakkara í vinnu við að ráðast á þessi kerfi og skila þeir að árásinni lokinni skýrslu um það hvað langt þeir komust og hvað þarf að laga. Það getur verið áhugavert að ráða hakkara í vinnu, en það er nóg til af mönnum sem búa yfir hæfileikum á þessu sviði.“

Hann segir fyrirtækið einnig hafa fylgt ferðaþjónustunni meira eftir undanfarin ár en áður. „Um er að ræða mjög mörg smærri fyrirtæki og hefur það þýtt að við höfum þurft að gera ákveðnar breytingar hjá okkur og fara í meiri fjárfestingu innanhúss til að sinna þessum fyrirtækjum. Það er hins vegar alls ekki slæmt að vera með marga smærri viðskiptavini, heldur er galdurinn sá að sníða þjónustuna að þörfum viðskiptavinarins. Að veita honum viðeigandi ráðgjöf og þjónustu miðað við það hvar hann er staddur hverju sinni og fylgja honum svo þegar hann stækkar.“