Vladimír Pútín Rússlandsforseti ræsti uppsjávarverksmiðju fyrir rússneska útgerðar- og fiskvinnslufyrirtækið Gidrostory á Eastern Economic Forum í Vladivostok í gær. Íslensku tæknifyrirtækin Skaginn 3X, Frost og Rafeyri hafa sett upp leiðandi tæknibúnað í verksmiðjunni, sem staðsett er á Shikotan-eyju í Kúríleyjaklasanum við austurströnd Rússlands. Greint er frá þessu í fréttatilkynningu.
Fyrirtækin undirrituðu samninginn um uppsetninguna á síðasta ári og virði samningsins hleypur á milljörðum íslenskra króna.Verksmiðjan er búin heildarlausnum frá fyrirtækjunum þremur til að flokka, pakka og frysta 900 tonn af uppsjávarfiski á sólarhring.
"Við hjá Skaganum 3X erum einstaklega stolt af verksmiðjunni og þakklát fyrir tækifærið til þess að taka þátt í nútímavæðingu rússneska sjávarútvegsins," segir Pétur Jakob Pétursson, sölustjóri Skagans 3X í Rússlandi í tilkynningunni.
"Íslenskur sjávarútvegur er sjálfbær og einn sá tæknivæddasti í veröldinni. Okkur hefur tekist að einblína á gæði vörunnar og þar af leiðandi fengið hærra verð fyrir minni heildarafla. Tækni og sjálfvirkni hefur spilað stórt hlutverk og stuðlað að eftirspurn eftir íslenskri þekkingu og lausnum," bætir Pétur Jakob við.
Í tilkynningunni segir að Skaginn 3X hafi náð miklum árangri í heildarlausnum við vinnslu á uppsjávarfiski. Fyrirtækið hafi meðal annars hannað og sett upp búnað með afkastagetu allt að 1.300 tonn á sólarhring fyrir færeyska félagið Varðin Pelagic. Færeyska verksmiðjan sé sú stærsta sinnar tegundar í heiminum og staðsett á Suðurey. Frost og Rafeyri hafi einnig komið að verkefninu fyrir Varðin Pelagic.
Skaginn 3X hefur nýverið lokið smíði á uppsjávarverksmiðju um borð í verksmiðjuskip fyrir evrópska útgerðarfyrirtækið France Pelagique, sem byggir á þeirri tækni sem Skaginn 3X hefur þróað fyrir landvinnslur á undanförnum árum. Eastern Economic Forum er vettvangur Rússa til þess að kynna landið og stuðla að erlendri fjárfestingu. Eigandi Gidrostroy-sjávarútvegsfyrirtækisins Alexander Verkhovskiy var viðstaddur þegar Pútín ræsti verksmiðjuna á þriðja degi ráðstefnunnar, sem hófst á mánudaginn.
