Þjónustuveitendur sem bjóða upp á viðskipti milli sýndarfjár, rafeyris og gjaldmiðla og bjóða upp á stafræn veski skulu óska eftir skráningu hjá Fjármálaeftirlitinu fyrir lok júlí, samkvæmt tilkynningu Fjármálaeftirlitsins.

Þá hefur Fjármálaeftirlitið gefið út nýjar reglur um gjaldeyrisskiptastöðvar, peninga- og verðmætasendingarþjónustu, þjónustuveitendur sem bjóða upp á viðskipti milli sýndarfjár, rafeyris og gjaldmiðla, og þjónustuveitendur stafrænna veskja, en þær taka við af eldri reglum.

Samkvæmt frétt morgunblaðsins segir talsmaður dómsmálaráðuneytisins að horft hafi verið til löggjafar í Evrópu við setningu laganna. Rafmyntaráð Íslands fagnar löggjöfinni.

Mikill uppgangur hefur verið í rafmyntagreftri hér á landi síðustu misseri samhliða miklum hækkunum á gangvirði margra rafmynta, vegna þess hve raforkufrekur gröfturinn er, og raforka ódýr hér. Því hefur verið spáð að orkunotkun slíkrar starfsemi fari bráðum fram úr heildarnotkun heimila landsins.

Smári McCarthy, þingmaður Pírata, hefur meðal annars gert þessa þróun að umræðuefni og talað um mikilvægi þess að koma á regluverki.